Amerika ikomeje kuyobora isi, mu kwibasirwa na Covid-19

Abishwe na Covid-19 muri Leta Zunze Ubumwe z’Amerika barenze 250,000, mu gihe ubwandu bwayo bwongeye kwiyongera mu gihugu. Nkuko bitangazwa na Kaminuza ya Johns Hopkins yo muri Amerika, kugeza ubu muri icyo gihugu abarenga miliyoni 11,5 bamaze kwandura coronavirus, muri bo abarenga 250,400 imaze kubica.

Amerika ni cyo gihugu cya mbere ku isi kimaze gutangaza abantu benshi cyane banduye coronavirus ndetse n’abo imaze kwica. Kandi ubwandu nanone bongeye kwiyongera mu bice bitandukanye by’Amerika, mu cyumweru gishize hari iminsi yaciye umuhigo w’ubwandu bwa mbere bwinshi. Dr Anthony Fauci ukuriye ikigo cy’Amerika cyo kurwanya no gukumira indwara zandura, yavuze ko iki gihugu “kirimo kujya mu cyerekezo kibi muri iki gihe kijegajega cyane”.

Muri iki gihe birashoboka ko abantu benshi bagiye kujya bateranira hamwe ari benshi mu ngo zabo kubera ko ubukonje burimo kwiyongera. Umujyi wa New York umaze igihe ari izingiro ry’iki cyorezo wategetse ko amashuri yose afungwa guhera kuri uyu wa kane, mu gihe ubwandu burimo kwiyongera.

Abategetsi bavuze ko bafashe icyemezo cyo gufunga aya mashuri ya leta ya mbere menshi muri Amerika kubera ko ikigero cy’ubwandu cyarenze 3%. Iki cyemezo kizagira ingaruka ku bana bagera ku 300,000.

Dr Fauci yavuze iki nyirizina?
Mu kiganiro yagiranye na BBC dukesha iyi nkuru, Dr Fauci yaburiye ko ubu bwandu burimo kwiyongera buzatuma abandi bantu bapfa. Ati: “Ni ibintu bikomeye cyane kubera ko hari ibimenyetso bibyemeza”. “Rero iyo ubonye habayeho kwiyongera cyane kw’abandura nkuko turimo kubibona ubu by’umwihariko ubwo abantu barimo kurushaho gukorera imirimo imbere mu nzu, [bivuze ko] turi mu bihe bigoye cyane”.

Yongeye gusaba abantu “kongera umuhate” wo gukurikiza amabwiriza yo kwirinda, nko kwambara agapfukamunwa, kutegerana no kwirinda guterana ari benshi. Dr Fauci yagize ati: “[Amabwiriza] Aroroshye cyane kandi turabizi ko atanga umusaruro. Ariko hari ukuntu hari abamaze kurambirwa Covid-19 – abantu barimo kumva bacitse intege zo gukomeza gukurikiza izi ngamba”.

Yashishikarije abantu “gukomeza umutsi ikindi gihe gito kubera ko ubufasha buri mu nzira buza” mu buryo bw’inkingo. Mu mpera y’ukwezi kwa gatatu ubwo Amerika yari igejeje ku bantu 2,200 bishwe na Covid-19 – Dr Fauci yari yaraguje umutwe ko iki cyorezo gishobora kwica Abanyamerika bagera ku 200,000 ndetse ababarirwa muri za miliyoni bandi bakandura iyi coronavirus.

Ese Iby’inkingo bigeze he?
Ejo ku wa gatatu, imibare yatangajwe n’ibigo Pfizer na BioNTech bikora inkingo, igaragaza ko urukingo ibyo bigo byakoze rwo gukingira iyi virusi bigaragara ko rurinda kuyandura ku kigero cya 94% ku bantu bakuru bafite hejuru y’imyaka 65.

[kwamamaza]

Mu cyumweru gishize, Pfizer na BioNTech batangaje iby’ibanze byavuye mu bushakashatsi bwabo bigaragaza ko urwo rukingo rurinda kwandura Covid-19 ku kigero cya 90% ndetse bavuga ko nta ngaruka mbi rugira ku buzima. Ibyo byakurikiwe n’amakuru ku rukingo rwakozwe na kompanyi Moderna yo muri Amerika avuga ko rukingira ku kigero kigera hafi kuri 95%, ndetse n’ibindi bitanga icyizere byavuye mu igeragezwa ry’urukingo Sputnik rwakozwe n’Uburusiya.

VIDEO WAREBA

Be the first to comment

Leave a Reply

Your email address will not be published.


*