Benshi barasaba ko Minispor yagenera ibihano abakozi ba Ferwafa.

Kuri uyu wa mbere ni bwo hasohotse imyanzuro y’Ishyirahamwe ry’Umupira w’Amaguru ry’u Rwanda (FERWAFA) ritangaza ibihano ku makipe n’abakozi b’iryo shyirahamwe bakoze amakosa yo kutubahiriza amabwiriza yo kurwanya Covid-19 yanabaye intandaro yo guhagarikwa kwa shampiyona y’umupira w’amaguru y’u Rwanda yari imaze gukinwa imikino itatu misa. Mu bihano byatangajwe, hahanwe amakipe atatu; Rayon Sports, AS Muhanga, Bugesera FC ndetse na ba komiseri batatu ba FERWAFA barimo umwe wahanishijwe gucibwa amafaranga ibihumbi 50 na ho abandi babiri bakihanangirizwa kuko batasuzumye ibyemezo byo kwipimisha.

Uyu ni uwitwa RWIRASIRA François: Komisiyo yasanze atarasuzumye ibyemezo byo kwipimisha COVID-19 ku bakinnyi n’abayobozi bari bitabiriye umukino wahuje Rutsiro FC na Rayon Sports FC wabaye ku wa 4 Ukuboza 2020, bityo Komisiyo ikaba isanga harabayeho uburangare ku ruhande rw’uwo muyobozi w’umukino ikaba imuhanishije kwishyura ihazabu y’amafaranga y’u Rwanda ibihumbi mirongo itanu (50,000Frw) yishyurwa mu gihe cy’amezi abiri. Icyakora nkuko bimaze kuba nk’ibisanzwe, igihano cyahawe Rayon Sports cyateje impagarara n’impaka zikomeye.

FERWAFA yavuze ko Rayon Sports FC ihamwa n’amakosa yo kutubahiriza amabwiriza yo kurwanya Covid-19 kandi ayo makosa yakoze akaba akomeje kugira ingaruka ku bitabiriye umukino wayihuje na Rutsiro FC bityo iyi kipe ikaba ihanishijwe kwishyura ihazabu y’amafaranga y’u Rwanda miliyoni ebyiri (2,000,000 Frw) azishyurwa bitarenze amezi abiri. Na ho kuri Bugesera FC Komisiyo Ishinzwe imyitwarire muri FERWAFA ngo yasanze ikipe ya Bugesera FC yemera amakosa yo kutubahiriza amabwiriza yo kwirinda COVID-19 mu mukino wayihuje na Espoir FC ku wa 4 Ukuboza 2020 ikaba yategetswe kwishyura ihazabu Frw 500,000 azishyurwa mu mezi abiri.”

Mu gihe kuri AS Muhanga iyo Komisiyo yemeje ko iyi kipe yakoze amakosa yo kutubahiriza amabwiriza ya COVID-19 mu mukino wayihuje na Etincelles FC ku wa 4 Ukuboza 2020 bityo Komisiyo itegeka AS Muhanga kwishyura ihazabu y’ibihumbi magana atanu by’amanyarwanda (500,000Frw) azishyurwa mu gihe cy‘amezi abiri.

Ese koko Ferwafa yaba yaribasiye Rayon Sports ngo yikure mu isoni?

Uretse kuba FERWAFA ivuga ko Rayon Sports yakoze “n’amakosa yo kutubahiriza amabwiriza yo kurwanya Covid-19 kandi ayo makosa yakoze akaba akomeje kugira ingaruka ku bitabiriye umukino wayihuje na Rutsiro FC”, nta yindi mpamvu yavuze yatumye ikubira kane uburemere bw’igihano yayihaye.

FERWAFA ntiyanasobanuye neza ingaruka abitabiriye uwo mukino wa Rayon Sports na Rutsiro FC bagizweho na wo bitandukanye no ku yandi makipe yahanwe.

Mu bavuze kuri ibi bihano, bamwe bavuze ko FERWAFA yabitangaje mu “kwikura mu isoni” zayikoze kuko ubwayo itashoboye kubahiriza amabwiriza yari yaremeranyijeho na Minisiteri ya Siporo mbere y’uko shampiyona isubukurwa.

Kuba nta cyo yari yakoze mbere y’uko Minisports ubwayo yifatira umwanzuro wo guhagarika shampiyon na yo ni indi mpamvu abasesenguzi babona yateye FERWAFA kugira icyo ikora ubu kandi ari yo yakurikiraniraga hafi umunsi ku wundi ibikorwa by’umupira w’amaguru mu Rwanda.

Haranibazwa ukuntu komiseri woherejwe na FERWAFA yemeye ko abakinnyi ba Rayon Sports batari bakabonye ibisubizo by’ibipimo bya Covid-19 ku mukino wayo na Rutsiro bajya mu kibuga ariko akaba ariwe wahawe ibihano “byoroshye cyane” (gucibwa 50000 FRW) mu gihe ikipe yo yahanishijwe gucibwa miliyoni 2 FRW.

Hari n’abasaba ko FERWAFA yasaba imbabazi kuko ibyabaye byose byatewe n’abakozi bayo barangaye nkana maze amakipe amwe agakina aterekanye ibyangombwa bigaragaza ko yipimishije nk’uko byasabwaga mu mabwiriza yayo. Umwe mu bakoresha urubuga rwa Twitter ku mazina ya Habumugisha Theoneste we yageze kure asaba ko abakozi ba FERWAFA bagahawe nibura igihano cy’igifungo cy’ukwezi kuko ari bo bashyize abakinnyi mu kibuga.

Yagize ati “Aba ba commiser banyu b’amabara ahubwo bari bakwiye igifungo n’iyo cyaba icy’ukwezi bakumva ko barengereye kuko nta kipe nimwe yishyize mu kibuga nibo babasizemo . Turambiwe ishyira ku ibere amakipe amwe andi mukayanaga ntabwo byumvikana mutwereke icyagendeweho hasumbanywa ibihano.

VIDEO WAREBA